Jermain Defoe á leið í aðgerð

Jermain Defoe, leikmaður Tottenham og enska landsliðsins, þarf að gangast undir aðgerð vegna meiðsla í nára í næstu viku og verður frá í mánuð af þeim sökum.

Þar með er ljóst að Defoe missir af leikjum Englands gegn Búlgaríu og Sviss í undankeppni EM 2012 í upphafi næsta mánaðar.

Hann mun þó líklega spila með Tottenham gegn Young Boys frá Sviss í síðari viðureign liðanna í umspili um sæti í riðlakeppni Meistaradeildar Evrópu annað kvöld.

Defoe hefur verið að glíma við meiðslin síðan á HM í Suður-Afríku í sumar og missti af leik Tottenham gegn Stoke í ensku úrvalsdeildinni um síðustu helgi af þeim sökum.

„Hann vill spila og æfa en meiðslin eru að verða verri og verkurinn meiri. Það er því kominn tími til að hann fari í aðgerðina en hann gæti náð hálfum leik þangað til," sagði Harry Redknapp, stjóri Tottenham.