Bæjarstjóranum óheimilt að framsenda læknisvottorð starfsmanns

Ásgerði Halldórsdóttur, bæjarastjóra Seltjarnarnesbæjar, var ekki heimilt að framsenda læknisvottorð starfsmanns sem sakar hana um einelti, á nokkra lykilstarfsmenn bæjarins að mati Persónuverndar.

Þetta kemur fram í úrskurði nefndarinnar sem féll í síðustu viku en málið á sér talsvert langan aðdraganda. Ólafur Melsted fyrrum framkvæmdarstjóri tækni- og umhverfissviðs bæjarins fór í leyfi sökum veikinda vegna meints eineltis af hálfu bæjarstjóra. Fékk hann vottorð frá heimilislækni sem taldi hann með öllu óvinnufærann vegna sjúkdómsins og ráðlagði honum að taka sér frí.

Bæjarstjóri áframsendi hinsvegar læknisvottorðið á nokkra lykilstarfsmenn Seltjarnarnesbæjar og í svari lögmanns bæjarins vegna málsins kemur fram að Ásgerður telji ekkert hafa komið fram í vottorðinu sem ekki sé almenns eðlis. Þar sé hvorki að finna sérstakar upplýsingar um heilsufar eða lýsingar sjúkdóms né aðrar upplýsignar sem ætla má að meðhöndla beri með sérstakri varúð, eins og það er orðað.

Ólafur og lögmaður hans leituðu því til persónuverndar sem hefur úrskurðað í málinu. Þar segir meðal annars að Persónuvernd telji það að greina samstarfsmönnum frá fjarveru eins starfsmanns vegna veikinda sé ekki miðlun persónuupplýsinga.

Upplýsingar á læknisvottorðum séu hinsvegar viðkvæmar persónuupplýsingar og bæjarstjóri hafi ekki sýnt fram á að að nauðsynlegt hafi veriða að senda öðrum starfsmönnum bæjarins vottorðið sérstaklega. Í ljósi þess kemst Persónuvernd að því að áframsending lænkisvottorðsins hafi verið óheimil.

Ólafur er enn í veikindaleyfi og undirbýr nú dómsmál á hendur Seltjarnarnesbæ, vegna meints eineltis bæjarstjóra.