Verða að sanna að þeir séu öryrkjar

Heilbrigðisyfirvöld í Bretlandi hafa ákveðið að láta öryrkja sanna að þeir séu ekki færir um að vinna.

Tilraunaverkefni hefur staðið yfir á Stór-Manchestersvæðinu þar sem umsækjendur um örorkustyrk hafa þurft að gangast undir próf sem felur í sér margvísleg atriði.

Sjötíu prósent umsækjendanna voru úrskurðaðir vinnufærir. Nú er ætlunin að snúa sér að þeim sem þegar eru á bótum. Þeir verða sendir til heimilislæknis síns þar sem þeir verða látnir gangast undir prófið.

Tilgangurinn er sagður sá að fá fólk af bótum og út á vinnumarkaðinn. Manchester var valin til tilraunaverkefnisins þar sem þar eru hlutfallslega fleiri á bótum en nokkursstaðar annarsstaðar í landinu.

Einn af hverjum tíu á vinnumarkaði er á bótum. Ýmsir bótaþegar eru þó undanteknir þessu verkefni til dæmis krabbameinssjúklingar og MS sjúklingar.

Samtök sem vinna að samfélagsmálum hafa gagnrýnt þessi próf harðlega og segja að í mörgum tilfellum sé verið að svíkja fólk sem sé mikið veikt.