Fordæma lekann hjá Wikileaks

Stjórnvöld í Bandaríkjunum hafa fordæmt birtingu leyniskjalanna sem Wikileaks vefsíðan hefur birt og jafnframt komið í hendur stórblaðanna New York Times, Der Spiegel og Guardian.

Segja stjórnvöld að þessi leki ógni lífi hermanna í Afganistan. Wikileaks hefur birt meira en 90 þúsund skjöl frá bandaríska hernum sem innihalda upplýsingar um stríðið í Afganistan frá árunum 2004 til dagsins í dag.

Fram kemur á fréttavef BBC að um sé að ræða einn mesta leka í sögu bandarísks hernaðar.

Meðal þess sem skjölin leiða í ljós er að pakistanska leyniþjónustan vinnur náið með Talibönum og að til eru sérstakar hersveitir sem leita uppi og taka af lífi leiðtoga Talibana án dóms og laga.