Suður-Kóreumenn undirbúa viðbrögð

Lee Myung-bak, forseti Suður-Kóreu, og ráðamenn í Seúl undirbúa nú viðbrögð við árás Norður-Kóreu á herskip sunnanmanna í lok mars. Forsetinn hyggst leita til öryggisráðs Sameinuðu þjóðanna um refsiaðgerðir gagnvart nágrönnum sínum í norðri.

Á miðvikudaginn fullyrtu stjórnvöld í Suður-Kóreu að tundurskeyti frá Norður-Kóreu hefði grandað einu herskipinu. Skipið var 1200 tonn að stærð með 108 manna áhöfn og fórust 46 sjóliðar. Stjórnvöld í Seúl höfðu áður ekki viljað saka Norður-Kóreu opinberlega um aðild að málinu en nú hafa rannsóknir alþjóðlegra sérfræðinga verið gerðar opinberar og segja þeir augljóst að um tundurskeyti hafi verið að ræða.

Norður-kóresk stjórnvöld hafa brugðist ókvæða við þessum ásökunum og segja að um uppspuna sé að ræða.