Prinsinn vissi ekki af samkomulagi Fergie

Enn eitt hneykslið skekur nú bresku krúnuna eftir að Sarah Ferguson var gómuð af rannsóknarblaðamanni þar sem hún krafðist rúmlega 90 milljóna króna fyrir að koma honum í samband við Andrew prins, fyrrverandi eiginmann sinn.

Breska dagblaðið News of the World hefur birt myndskeið sem sýnir fund á milli fréttamanns blaðsins og Söruh Ferguson, hertogaynju af York. Á hótelherbergi í London sést hún taka við tölvutösku sem á að innihalda rúmar sjö milljónir króna sem fyrirframgreiðslu frá manninum sem Sarah telur vera auðugan viðskiptajöfur.

Á myndbandinu segist Sarah geta opnað ýmsa möguleika fyrir manninn með því að koma honum í samband við Andrew prins, fyrrverandi eiginmann sinn. Hún segist vera í fjárþörf en ef blaðamaðurinn sjái um hana, muni Andrew sjá um hann. Restina af fjárhæðinni, eða um 85 milljónir króna biður hún um að verði lagðir inn á einkareikning hennar. Þetta muni opna mikla viðskiptamöguleika fyrir manninn, þar sem Andrew sé sérstakur talsmaður fyrir viðskipti og fjárfestingar í Bretlandi.

News of the World fullyrðir að prinsinn hafi ekki vitað af samningnum. Sarah hafi logið þegar hún sagði að Andrew hefði stungið upp á því að upphæðin væri rúmlega 92 milljónir. Hertogaynjan hefur ekki gefið færi á sér við fjölmiðla í dag, en málið þykir afar vandræðalegt fyrir hertogaynjuna sem skildi við prinsinn árið 1996.