Erkiengillinn búinn að kæra brottvísun sína

Íslenskur lögmaður Leifs Ivar Kristiansen, leiðtoga norsku Vítisenglanna, er búinn að kæra brottvísun hans frá Íslandi til dóms- og mannréttindamálaráðuneytisins.

Leif var handtekinn í Leifsstöð við komuna til landsins þann áttunda febrúar síðastliðinn. Hann sat í varðhaldi þar til hann var sendur aftur til Noregs í daginn eftir. Norskur lögmaður Leifs, Morten Furuholmen, fékk hins vegar inngöngu í landið óáreittur.

Muni dóms- og mannréttindamálaráðuneytið staðfesta ákvörðun Útlendingastofnunar getur Kristiansen stefnt íslenska ríkinu fyrir héraðsdómi. Samkvæmt heimildum Vísis getur það hins vegar tekið ráðuneytið nokkra mánuði að taka afstöðu til kærunnar.