Milner: Wembley er einn sá versti

„Maður vinnur hörðum höndum að því að komast í úrslitaleikinn og hann fer síðan fram á einum versta velli sem þú spilar á yfir árið," sagði James Milner, leikmaður Aston Villa.

Hann er ekki hrifinn af ástandi gras-vallarins á Wembley þar sem Villa lék úrslitaleik gegn Manchester United á sunnudag. Hann vonar að völlurinn verði í betra ástandi á morgun þegar England leikur vináttulandsleik gegn Egyptalandi.

„Í hreinskilni sagt er völlurinn verri en hjá þeim liðum í neðri deildum sem við höfum spilað gegn. Wembley er heimavöllur Englands og maður býst við að undirlagið sé það besta sem kostur er á. Þannig er það ekki í augnablikinu," sagði Milner.

„Þegar ég ólst upp og horfði á leiki frá Wembley var alltaf talað um að völlurinn væri eins og teppi. Ég hef síðan spilað þarna nokkrum sinnum og aldrei tekið eftir að grasið væri sérstaklega gott. Ég er ekki sérfræðingur í þessu en ef þeir geta látið völlinn vera eitthvað í líkingu við völlinn hjá Arsenal þá verðum við sáttir."