Með heila frystiklefa í geymslu

Lögreglan á höfuðborgarsvæðinu hefur þurft að taka á leigu viðbótarhúsnæði til geymslu á tækjum og tólum sem hald hefur verið lagt á hjá kannabisræktendum um land allt á undanförnum misserum. Húsnæðið sem notað hefur verið í þessu skyni er löngu sprungið.

„Það er mikil fyrirferð í þessum hlutum,“ segir Benedikt H. Benediktsson lögreglufulltrúi. Hann segir að enn þurfi að geyma búnaðinn úr flestum stóru ræktunarmálanna frá síðasta ári, þar sem ekki sé genginn dómur í vel flestum þeirra. Mikill búnaður fylgi kannabisræktunum. Í einu tilviki hafi menn notað stóran frystiklefa undir ræktun. Lagt hafi verið hald á klefann og hann settur í geymslu.

„Sjálfsagt fer eitthvað af lömpunum úr þessum málum frá í fyrra til sinna réttu eigenda senn hvað líður,“ segir Benedikt. „Það flækir þó málið að oft eru lamparnir ekki merktir nema eftir tegundum og styrk.“ - jss