Gylfi: Stjórn Íslandsbanka ber ábyrgð á ráðningu bankastjóra

„Það er ótvírætt mín skoðun að það eigi að auglýsa í stöður hjá fyrirtækjum sem eru að meirihluta í eigu ríkisins," segir Gylfi Magnússon viðskiptaráðherra um ráðningu Birnu Einarsdóttur áfram í stöðu bankastjóra Íslandsbanka. Ákveðið var á síðasta stjórnarfundi Íslandsbanka að ráða Birnu áfram, án þess að staðan væri auglýst.

Gylfi bendir á að Íslandsbanki sé ekki nema að óverulegu leyti í eigu ríkisins. „Það verður að líta á þetta sem málefni þeirra sem stjórna fyrirtækinu," segir Gylfi. Gylfi segir þó að þeir sem séu ráðnir til bankastjórastarfa þurfi að uppfylla þær kröfur sem gerðar séu í lögum til þeirra. „Þannig að ef einhver opinber aðili ætti að fetta fingur út í þetta þá er þetta Fjármálaeftirlitið sem fer með hæfismat á stjórnendum fjármálafyrirtækja," segir Gylfi.

Gylfi bendir þó á að Bankasýsla ríkisins sé með mann í stjórn Íslandsbanka. Það sé þó stofnunarinnar að svara fyrir þann mann.