Full ástæða til að óttast brottflutning fólks

Jóhanna Sigurðardóttir, forsætisráðherra, segir að það sé full ástæða til að hafa áhyggjur af brottflutningi fólks frá Íslandi.

Samkvæmt tölum Hagstofunnar fluttu tæplega fimm þúsund manns frá landinu í fyrra umfram þá sem fluttu til landsins. Fækkun fólks, búsettu á Íslandi, nam því einu og hálfu prósenti í fyrra, og er viðlíka tölur hvergi að finna á Vesturlöndum.

Unnur Brá Konráðsdóttir, þingmaður Sjálfstæðisflokks, spurði Jóhönnu út í málið á Alþingi í dag. Jóhanna sagði að hafa verði í huga að helmingur þeirra sem fluttu frá Íslandi á tímabilinu hafi verið útlendingar sem komu hingað í góðærinu.

„Engu að síður er full ástæða til þess að hafa áhyggjur af þessari þróun og ríkisstjórnin er að vinna allt hvað hún getur til að koma í veg fyrir að Íslendingar sjái ástæðu til þess að flytjast búferlum," sagði Jóhanna.