Bjóða íslenskum konum pening fyrir erótísk myndbönd

Íslenskur erótískur samskiptavefur hefur auglýst eftir ungum íslenskum konum til þess að sitja fyrir á djörfum ljósmyndum eða myndskeiðum. Vefurinn, sem heitir Purplerabbit.is, inniheldur djörf myndbrot af íslenskum konum sem eru að gæla við brjóst sín eða stunda sjálfsfróun. Vefurinn greiðir tuttugu þúsund krónur fyrir hvert myndband.

Vefurinn er allur á íslensku og má meðal annars finna fjölmargar djarfar nektarmyndir sem virðast vera af íslenskum konum. Á Purplerabbit, eða kanínunni eins og hann virðist vera kallaður, má finna útskýringar á vefnum sjálfum en þar segir meðal annars: „Kanínan er stökkpallur fyrir djarfar fyrirsætur, leikara og leikkonur sem vilja kynna sig fyrir umheiminum eða halda nafni sínu á lofti og birta sýnishorn afurða sinna, kynnast væntanlegum viðskiptavinum sínum og selja beint til þeirra og jafnvel framleiða efni fyrir valda (viðskipta)vini sína eftir pöntun."

Þá vekur önnur klausa einnig athygli sem er eftirfarandi: „Þess utan, ef þú stundar einhvers konar vændi, hvort sem er blátt áfram eða dulið á bak við nöfn eins og fylgdarþjónusta eða erótískt nudd eða bara nudd, þá getum við því miður ekki boðið þér afnot af þessum vef."

Hægt er að skrá sig inn á vefinn auk þess sem það er boðið upp á áskrift. Nú þegar hafa tæplega þrjú þúsund manns skráð sig inn á vefinn.