Pétur: Hef verið áhorfandi hingað til

Pétur Viðarsson, varnarmaður FH, var ánægður með að hafa fengið loksins að taka þátt í Íslandsmótinu með sínu liði eftir að hafa fylgst með frá hliðarlínunni undanfarin ár.

Pétur er á 22. aldursári og hafði fyrir tímabilið aðeins komið við sögu í einum leik með FH í efstu deild. Hann var svo í láni hjá Víkingi, Reykjavík, í fyrra.

„Það var afar gaman að fá að taka þátt í þessu af fullum krafti," sagði Pétur í samtali við Vísi. „Það er auðvitað allt öðruvísi að fá að spila. Ég hef bara verið áhorfandi hingað til."

„Ég er bara nokkuð sáttur við mína frammistöðu í sumar. FH er með besta lið á Íslandi og mér fannst ég passa vel inn í liðið. Okkur er kennt í yngri flokkunum að spila samkvæmt sama leikkerfi og það eru líka margir góðir leikmenn í hópnum sem eru duglegir að hjálpa manni."