Óli Stefán ætlar að þjálfa Sindra næsta sumar

Óli Stefán Flóventsson hefur ákveðið að hætta spila með Grindavík í Pepsi-deild karla og tekur í staðinn við D-deildarliði Sindra frá Höfn í Hornafirði. Þetta kemur fyrst fram á fótbolti.net. Hann ætlar einnig að spila með liðinu næsta sumar.

Óli Stefán er leikjahæsti leikmaður Grindavíkur í efstu deild (194 leikir) og hefur alls leikið 213 leiki með Grindavík og Fjölni í efstu deild. Hann byrjaði tímabilið með norska liðinu Vard Haugesund en snéri aftur heim um mitt sumar.

Sindri endaði í 4. sæti í sínum riðli í 3. deildinni í sumar en var í baráttunni um að komast í átta liða úrslitin allt fram í síðasta leik. Liðið vann 9 af 15 deildarleikjum (6 töp) í sumar og var með markatöluna 33-25.

Sindri hefur verið í D-deildinni síðan 2008 en sumarið 2010 verður fyrsta tímabilið síðan 1996 þar sem Sindra-liðið er svo lengi utan efstu þriggja deildanna.