Erlendir Vítisenglar bíða úrskurðar dómsmálaráðuneytis

Vítisenglar frá þremur löndum hafa kært Útlendingastofnun til dómsmálaráðuneytis fyrir að hindra för þeirra til Íslands í mars síðastliðnum. Alls bárust á annan tug kæra frá vítisenglum í Danmörku, Finnlandi og Noregi. Samkvæmt Oddgeiri Einarssyni, lögfræðingi, þá var málið kært strax í mars.

Málið hefur svo verið í meðförum ráðuneytisins í fimm mánuði sem þykir í lengra lagi. Aftur á móti er engin sérstök tímamörk á kærum til ráðuneytisins. Hinsvegar er til ákveðin regla um málsmeðferð þar sem kveður á um að þeim skuli hraðað eftir besta megni.

Það var í mars síðastliðnum sem Fáfni, sem nú heita Hell Angels prospect, héldu upp á afmælið sitt. Þeir buðu Vítisenglum frá fjölda landa en yfirvöld ákváðu að hleypa þeim ekki inn til landsins. Vítisenglarnir erlendu voru ósáttir við meðferðina og ákváðu að kæra málið.

Að sögn Oddgeirs var málið kært strax í mars. Síðan hefur lítið heyrst af gangi mála. Dómsmálaráðuneytið mun ákveða hvort ákvörðun útlendingastofnunnar hafi verið réttmæt eða ekki. Aðspurður segir Oddgeir að fallist dómsmálaráðuneytið á ákvörðun útlendingastofnunnar þá sé ólíklegt að málið rati fyrir héraðsdóm í kjölfarið. Ástæðan er sú að Vítisenglarnir voru ekki settir í endurkomubann.

Fallist ráðuneytið hinsvegar á rök Vítisenglanna þá geta þeir sótt skaðabætur hjá ríkinu.

Samkvæmt heimildum Vísis þá eru fleiri kærur á hendur ríkisins af hálfu Vítisengla á leiðinni. Þær varða meinta ólögmætar handtökur, hleranir og gæsluvarðhaldsúrskurði.

Vísir greindi frá því á föstudaginn að vélhjólaklúbburinn Fáfnir hefði verið formlega lagður niður. Þeir hafa hlotið náð fyrir augum Hells Angels og eru nú svokallaðir áhangendur.

Ríkislögreglustjóri hefur sent frá sér yfirlýsingu vegna málsins en embættið lítur á klúbbinn sem anga af skipulagðri glæpastarfsemi. Þá telur ríkislögreglustjóri ennfremur að íslensku Vítisenglarnir muni fá fulla aðild að Hells Angels eftir eitt og hálft ár.

Forsvarsmaður Hells Angels prospect vildi ekki tjá sig um málið þegar haft var samband við hann.