Fá humar frá Vinnslustöðinni

Vinnslustöðin í Vestmannareyjum afhenti í dag Fjölskylduhjálp Íslands og Mæðrastyrksnefnd Reykjavíkur að gjöf samtals 900 kíló af humri til dreifingar meðal skjólstæðinga samtakanna fyrir jólin. Humarinn er frosinn í 450 gramma pokum. Hvor samtök fengu 1.000 poka til ráðstöfunar.

Landflutningar-Samskip tóku að sér að flytja humarinn til Reykjavíkur án endurgjalds, geyma hann hjá Samskipum og flytja á dreifingarstaði Fjölskylduhjálparinnar og Mæðrastyrksnefndar þegar á að afhenda vöruna.

„Humrinum fylgja kveðjur frá Eyjum með ósk um gleðileg jól, farsæld og frið á nýju ári. Sigurgeir Brynjar segir að margir starfsmenn Vinnslustöðvarinnar hafi kynnst atvinnuleysi og erfiðleikum þegar fyrirtækið átti í miklum rekstrarvanda með tilheyrandi uppsögnum fyrir rúmlega einum áratug. Þeir geti því auðveldlega sett sig í spor fólks sem þurfi að þola tekjufall, atvinnumissi og tilheyrandi erfiðleika vegna efnahagshrunsins," segir í tilkynningu.

Vinnslustöðin hafi síðan unnið sig út úr erfiðleikunum og standi nú á styrkum stoðum. Þess njóti bæði starfsmennirnir og sjálft Eyjasamfélagið. „Aðalatriðið er samt það að Vinnslustöðin vill heiðra Fjölskylduhjálpina og Mæðrastyrksnefnd fyrir einstaka starfsemi og fórnfýsi gagnvart fólk sem þarfnast stuðnings á erfiðum tímum. Við vonumst til að skjólstæðingar þessara góðu samtaka taki við humrinum stoltir og njóti hans vel um jólin."