Lífeyrissjóðir með svipað tap og aðrir

Íslensku lífeyrissjóðirnir skiluðu neikvæðri ávöxtun upp á 21,5 prósent í fyrra, miðað við tölur frá Fjármálaeftirlitinu. Margir erlendir lífeyrissjóðir skiluðu verri ávöxtun en þeir íslensku gerðu og það þrátt fyrir efnahagshrunið hér á landi. Norski olíu­sjóðurinn skilaði til dæmis neikvæðri ávöxtun upp á 23,3 prósent og belgískir sjóðir skiluðu ávöxtun upp á mínus 25 prósent árið 2008.

Írskir lífeyrissjóðir skiluðu neikvæðri ávöxtun upp á 23 prósent, meðalávöxtunin hjá OECD-sjóðunum var neikvæð um 19 prósent, stærsti lífeyrissjóðurinn í Hollandi, ABP, skilaði neikvæðri ávöxtun upp á 20,2 prósent og AP3, sem er opinber lífeyrissjóður í Svíþjóð, skilaði 19,8 prósentum í neikvæða ávöxtun svo að dæmi séu nefnd.

Inni í ávöxtun íslensku lífeyrissjóðanna vantar tölur frá nokkrum lífeyrissjóðum. Stærstur þeirra er sennilega Lífeyrissjóður starfsmanna ríkisins, LSR. Hrafn Magnús­son, framkvæmdastjóri Landssamtaka lífeyrissjóða, LL, segir að þetta breyti ekki miklu varðandi niðurstöðutöluna. Ekki skipti öllu máli hvort ávöxtunin verði -21,5 eða -22,5 prósent því að hún sé á þessu bili.

„Við getum ekki séð að þetta sé slæmt miðað við allt og allt," segir Hrafn, „ekki síst vegna þess að innlendur hlutabréfamarkaður bara hvarf. Hann bara hrundi og þá er þetta alls ekki slæmt."

Hrafn segir að lífeyrissjóðirnir hafi komið vel út úr efnahagslægðinni 2000-2002. „Þá stóðum við okkur mjög vel. Við vorum með neikvæða ávöxtun upp á 1,9 prósent 2001, 3,0 prósent 2002 og 0,7 í mínus árið 2000. Þetta voru lágar tölur. Þær voru mun hærri erlendis."

Hrafn bendir á að fyrst 1991 hafi byrjað að koma tölur frá Bankaeftirlitinu um ávöxtun íslensku lífeyrissjóðanna. Ef horft sé á tímabilið frá 1991 til og með 2008 þá komi í ljós að raunávöxtunin sé jákvæð yfir 3,5 prósentum sem sé viðmiðunarmarkmið, „þrátt fyrir svona geysilega slæmt ár eins og var í fyrra".

Hrafn telur útilokað að ávöxtun lífeyrissjóðanna verði jafn slæm og í fyrra. Það fari þó eftir þróuninni erlendis.

„Hún skiptir mestu máli í dag og líka hvernig gengi íslensku krónunnar verður þegar upp er staðið. Ég held að botninum sé náð. Það dettur engum í hug að við fáum svona ár aftur."

ghs@frettabladid.is