Enginn þingmaður mætti

Enginn þingmaður Borgarahreyfingarinnar mætti á félagafund hreyfingarinnar sem haldinn var í gærkvöldi.

Umræðuefni fundarins var samskiptaörðugleikar þingmannanna og stjórnar hreyfingarinnar og klofningurinn meðal þingmannanna. Greint var frá því í Fréttablaðinu í gær að Þráinn Bertelsson hafi ekki talað við hina þingmennina þrjá frá því að atkvæðagreiðsla um Evrópusambandið fór fram á Alþingi.

Félagafundurinn í gær var haldinn með stuttum fyrirvara og var það gagnrýnt á heimasíðu hreyfingarinnar í gær. Margrét Tryggvadóttir þingkona greindi frá því á heimasíðu sinni að þingmennirnir hefðu verið boðaðir á fundinn með átta klukkustunda fyrirvara. Hún hafi því tekið ákvörðun um að mæta ekki á fundinn. Birgitta Jónsdóttir sagðist ekki hafa haft aðgang að pössun fyrir son sinn vegna stutts fyrirvara.

Hún greindi líka frá því að Þór Saari yrði á fundi með nefnd sinni og kæmist því ekki heldur á fundinn. Að auki hafði Þráinn Bertelsson aldrei ætlað að mæta, enda ekki talað við samflokksfólk sitt undanfarið.

Bæði Birgitta og Margrét tóku einnig fram að þeim þætti slæmt að eyða tíma í þessar innanflokksdeilur á meðan Icesave-málið væri óleyst. - þeb