Gunnar Már á leiðinni til Íslandsmeistara FH

Fjölnismaðurinn Gunnar Már Guðmundsson er á leiðinni til Íslandsmeistara FH samkvæmt frétt í kvöldfréttum Stöðvar 2 í kvöld. Gunnar Már á eitt ár eftir af samningi sínum við Grafarvogsliðið sem er fallið í 1. deild. Hann sjálfur vildi hvorki játa né neita þessum fréttum í viðtali við íþróttadeild Stöðvar 2.

Gunnar Már á eftir að spila einn leik með Fjölni í Pepsi-deild karla en Fjölnir sækir Stjörnumenn heim í Garðabæ á laugardaginn í lokaumferð Pepsi-deildar karla.

Gunnar Már er markahæsti leikmaður Fjölnis í efstu deild karla en hann hefur skorað 15 mörk í 42 leikjum. Hann skoraði 10 mörk í 22 leikjum í deildinni í fyrra.

Gunnar Már, sem er kallaður "Herra Fjölnir", hefur leikið allan sinn feril með Fjölnisliðinu og spilaði með liðinu í öllum deildum frá því að liðið fór úr 3. deildinni upp í efstu deild á árunum 2002 til 2008.