Fleiri hjálparþurfi í Danmörku

Það er ekki einungis hér á Íslandi sem óskum eftir aðstoð frá hjálparsamtökum fjölgar.

Fréttavefur danska Avisen greinir frá því í dag að meira sé að gera hjá danska Hjálpræðishernum, Mæðrastyrksnefnd og fleiri hjálparsamtökum í Danmörku þessa dagana en oft áður.

Danir hafa nefnilega ekki farið varhluta af samdrættinum í alþjóðahagkerfinu og bágstaddir foreldrar eru farnir að huga að því hvernig þeir geta glatt börnin sín fyrir jólin. Umsóknir um matarpakka eða gjafakort streyma því inn sem aldrei fyrr.