Mesti viðbúnaður í sögunni

Viðbúnaðurinn við svínaflensunni er sá mesti í Íslandssögunni að mati Haraldar Briem sóttvarnalæknis. „Ég hugsa að það hafi aldrei verið viðbúnaður í stíl við þetta nokkurn tímann á Íslandi. Við erum búin að undirbúa okkur nokkuð stíft í fjögur ár. Þá höfðum við í huga þessa fuglaflensu sem er búin að vera í gangi,“ segir Haraldur. „Hún er mjög skæð og annar hver maður deyr sem fær hana. En hún hefur aldrei náð því að berast frá manni til manns,“ segir hann og útskýrir að hún hafi aldrei náð að stökkbreytast eins og búist hafi verið við.

„Við eigum lyf fyrir hálfa þjóðina til að nota ef menn veikjast og þetta er í fyrsta skipti sem við fáum bóluefni sem við getum vonandi veitt til allrar þjóðarinnar.“ Búist er við því að bólusetning fyrir alla Íslendinga við svínaflensunni geti hafist í lok nóvember eða byrjun desember.

Alls eru níu manns á aldrinum 30 til 63 ára á gjörgæslu vegna flensunnar. Einn er á Akureyri og átta á Landspítalanum og hefur þeim fjölgað um tvo síðan á laugardag. Sjúklingarnir komu báðir utan af landi, annar frá Neskaupstað og hinn frá Vestmannaeyjum. Fimm til viðbótar lögðust á Landspítalann í gær og nú liggja þar 28 manns með svínaflensu á almennri deild. Hátt í tugur manna liggur á sjúkrahúsum annars staðar á landinu og því ljóst að flensan hefur breiðst út um allt landið. - fb