Snorri býður sig fram til formennsku í BSRB

Snorri Magnússon, formaður Landssambands lögreglumanna hefur tilkynnt að hann bjóði sig fram til formanns Bandalags starfsmanna ríkis og bæja, eða BSRB, á 42. þingi bandalagsins, sem haldið verður á Grand Hótel í Reykjavík, dagana 21. - 23. október næstkomandi.

Búast má við spennandi kosningu en Ögmundur Jónasson gegndi embættinu í fjöldamörg ár þar til hann fór í leyfi til að gegna ráðherrastörfum. Auk Snorra hafa þau Arna Jakobína Björnsdóttir formaður Kjalar, Árni Stefán Jónsson formaður SFR og starfandi formaður BSRB og Elín Björg Jónsdóttir formaður Félags opinberra starfsmanna á Suðurlandi lýst yfir framboði.