Kominn með aðra leggjalanga blondínu

Leikstjórinn Guy Ritchie hefur alltaf verið nokkuð veikur fyrir leggjalöngum blondínum. Áður en hann gerði sér dælt við Madonnu var hann á föstu með leggjalöngu sjónvarpskonunni Taniu Strecker. Nú er Ritchie kominn á fast með leggjalöngu módeli sem er 28 árum yngri en Madonna. Sú heitir Petrina Khashoggi.

Leikstjórinn hefur undanfarið farið út með módelinu og vinir þeirra segja þau hafa hist í nokkrar vikur, en vilji fara leynt með samband sitt.

Nýja kærastan komst í fréttirnar árið 2002 þegar hún komst að því hver faðir hennar var. „Ég vildi að ég væri bara venjuleg gömul Sarah Brown með venjulegt fjölskyldulíf," sagði hún á þeim tíma.

Heimaildarmaður The Sun segir að Petrina geri allt til þess að sambandið gangi upp. Hún hafi meðal annars fengið ráðgjöf um hvernig eigi að haga sér í stórstjörnusambandi.