Myndamaraþoni að ljúka

Frosti Örn Gnarr Gunnarsson, stjúpsonur Jóns Gnarr, heldur úti heimasíðu þar sem hann hefur birt eina tölvugerða mynd á dag í tæpt ár. Um sannkallað mynda­maraþon er að ræða því myndirnar eru orðnar 354 talsins og eiga því aðeins ellefu eftir að birtast.

Frosti Örn býr myndirnar til samdægurs og sendir síðan á 580 manna póstlista sem hann er með í tölvunni sinni. Myndirnar, sem má sjá á síðunni Coroflot.com/jackdesign, eru því fyrir löngu orðnar fastur liður í tilveru þeirra. „Þemað er dagurinn í dag og þess vegna geri ég þetta alltaf á kvöldin," segir Frosti Örn, sem er á þriðja ári í Listaháskóla Íslands.

Eftir að verkefninu lýkur eftir tvær vikur ætlar hann að safna myndunum saman í bók og nota sem lokaverkefni sitt. Hann segist hafa fengið góð viðbrögð við uppátækinu og viðurkennir að hann muni sakna þess að senda ekki lengur frá sér myndirnar. „Ég er með kvíðahnút í maganum. Maður veit ekkert hvað tekur við. Þetta er eins og að fá að ala upp barn í ár og þurfa svo að skila því," segir hann. „Það hlýtur að taka við rosa tómleikatilfinning en ég tek mér bara eitthvað annað skemmtilegt fyrir hendur."

Hann fékk hugmyndina þegar hætt var við skólaferðalag til Hollands á síðasta ári þar sem hann ætlaði að einbeita sér að listinni í þrjár vikur. Þess í stað ákvað hann að gera eina mynd á dag í heilan mánuð, sem síðar varð að einu ári.

Frosti hefur haft fleira á sinni könnu að undanförnu þar á meðal hönnun stuttermabola og einnig plötuumslaga fyrir Ragnar Sólberg og Sign. - fb