Duff úr leik hjá Írum

Damien Duff verður ekki með írska landsliðinu sem á tvo mikilvæga leiki framundan í undankeppni HM 2010. Duff meiddist á æfingu á miðvikudaginn.

Írland mætir Búlgaríu á morgun og svo Ítalíu á miðvikudaginn og er það því mikið áfall að missa Duff fyrir þessa tvo leiki.

Stephen Hunt, leikmaður Reading, mun taka stöðu Duff í byrjunarliðinu eftir því sem kemur fram í breskum fjölmiðlum.

Duff tognaði í vöðva aftan í læri og verður af þeim sökum frá næstu tvær vikurnar.

Írar eru í góðri stöðu í 8. riðli undankeppni HM 2010. Liðið er með tíu stig eftir fjóra leiki, rétt eins og Ítalía. Búlgaría er í þriðja sæti riðilsins með aðeins þrjú stig eftir jafn marga leiki.

Svartfjallaland, Georgía og Kýpur eru öll með færri stig og hafa leikið þrjá leiki nema Georgía sem hefur leikið fimm.