Geir fundaði með lögreglumönnum um mótmælin

Geir Haarde forsætisráðherra ræddi við forystumenn Landssambands lögreglumanna í morgun vegna þeirra mótmæla sem hafa staðið yfir undanfarnar vikur og náðu hámarki í gær. Geir greindi frá þessu á fundi með fréttamönnum fyrir þingflokksfund sjálfstæðismanna sem hófst um fjögurleytið.

Geir sagði að lögreglunni bæri að vernda borgarana og hún væri að sinna hlutverki sínu afar vel. Hann tekur ekki undir gagnrýni um að lögreglan hafi gengið of hart fram í störfum sínum.

„Ég get ekki neitað því," sagði Geir þegar hann var spurður að því hvort að honum hafi fundist sér vera ógnað þegar aðsúgur varð gerður að honum fyrir framan Stjórnarráðið í dag.