Segja aðgerðir stjórnvalda engan veginn duga

Fyrir liggur að þær aðgerðir, sem þegar hefur verið gripið til af hálfu stjórnvalda og fjármálastofnana duga engan veginn til að mæta þeim vanda sem við blasir, segir í ályktun miðstjórnar ASÍ um greiðsluvanda heimilanna. Að óbreyttu mun ástandið aðeins versna næstu mánuðina, segir þar, ekki síst í ljósi þess að á sama tíma og skuldir vaxa hratt fer kaupmáttur almennings minnkandi. Ríkisstjórnin verði strax að koma með raunhæfar aðgerðir til að fólk missi ekki alla von um mannsæmandi afkomu á næstu árum, segir í ályktun ASÍ.