Skemmtistaðurinn London Reykjavík verður opnaður á neðri hæðinni á gamla Gauki á Stöng í kvöld. Áhersla verður lögð á danstónlist af ýmsum toga og ættu dansþyrstir Íslendingar því að fá þarna eitthvað fyrir sinn snúð.
Skemmtanastjórinn Kristinn Bjarnason segir að mikil þörf sé fyrir stað sem þennan í miðborginni. „Við vonumst til að fólk taki þessu vel og mæti á svæðið og skemmti sér. Þarna verður gamla hljóðkerfið sem var á Pravda sem er þekkt fyrir rosalega gott sánd,“ segir hann. „Þetta verður alhliða dansstaður sem verður opinn um allar helgar með áherslu á hinar ýmsu stefnur.“
Aldurstakmark á London Reykjavík verður 22 ár og er ætlast til að fólk mæti þangað í vel pressuðum dansgalla og pússuðum skónum. Staðurinn verður opnaður klukkan 23 í kvöld þar sem blanda af diskói og nútímadanstónlist verður í fyrirrúmi. - fb
