Óskar Örn Hauksson skrifaði í hádeginu í dag undir nýjan þriggja ára samning við KR. Þetta staðfesti Rúnar Kristinsson, yfirmaður íþróttamála hjá félaginu, í samtali við Vísi.
Óskar kom til KR frá Grindavík fyrir þremur árum síðan og hefur síðan þá spilað 68 leiki í deild og bikar með félaginu og skorað í þeim ellefu mörk.
Hann hefur spilað nánast alla deildarleiki liðsins síðustu tvö ár en hann missti af aðeins einum leik í sumar.
„Það eru frábærar fréttir fyrir KR að Óskar Örn verði áfram hjá félaginu," sagði Rúnar. „Björgólfur skrifaði undir nýjan samning í gær og því útlit fyrir að litlar breytingar verði á leikmannahópnum okkar. Það hefur verið stefna KR í mörg ár að haga þannig að málum."
Jónas Guðni Sævarsson fór í atvinnumennsku í sumar og útlit er fyrir að Stefán Logi Magnússon fari sömu leið. Þá tók Guðmundur Benediktsson við liði Selfoss í gær og Prince Racjomar fór einnig frá liðinu í sumar.
