Breskir embættismenn reknir frá Íran

Tveir breskir embættismenn í Íran voru sendir úr landi í gær. Það var gert í kjölfar ásakana um að bresk stjórnvöld hafi skipt sér með óeðlilegum hætti af kosningunum í Íran hinn 12. júní síðastliðinn.

Bresk stjórnvöld svöruðu með því að senda tvo íranska embættismenn frá Bretlandi.

Á föstudag gagnrýndi Ali Khamenei Íransleiðtogi Vesturlönd og sagði bresku ríkisstjórnina vera þá verstu. Á mánudag tilkynntu bresk stjórnvöld að þau hefðu kallað fjölskyldur embættismanna í Íran heim til Bretlands í öryggisskyni.

Í gær greindi svo íranska utanríkisráðuneytið frá því að tveir breskir embættismenn hefðu verið reknir úr landi fyrir „óhefðbundna hegðun".

Barack Obama Bandaríkjaforseti sagði á blaðamannafundi að Bandaríkin og heimurinn allur væru hneyksluð á framferði íranskra stjórnvalda og fordæmdi „hótanir, barsmíðar og fangelsanir síðustu daga". Hann segir Bandaríkin viðurkenna fullveldi Írans og ekki skipta sér af málefnum landsins.

Engin mótmæli fóru fram í Teheran í gær fyrir utan um 100 manna hóp sem mótmælti Vesturlöndum fyrir utan breska sendiráðið, þar sem fánar Bretlands, Bandaríkjanna og Ísraels voru brenndir. Svo virðist sem lögreglu og sérsveitum hafi tekist að brjóta mótmæli vegna forsetakosninganna á bak aftur í bili.

Að minnsta kosti sautján hafa látið lífið í mótmælunum og á mánudag birtust myndskeið á netinu af dauða ungrar konu sem hafði orðið fyrir skoti. Konan hét Neda Agha Soltan og hefur orðið nokkurs konar tákngervingur mótmælanna. Bandaríkjaforseti tjáði sig einnig um dauða hennar og sagði myndbandið átakanlegt. Þá sagði hann að þeirra sem berðust fyrir réttlæti yrði alltaf minnst í sögunni.

Æðsti klerkurinn Khamenei féllst í gær á að framlengja kvörtunarfrest vegna kosninganna um fimm daga. Íranska klerkastjórnin virðist þó enn vera ákveðin í að hunsa kröfur um að kosið verði á nýjan leik.

thorunn@frettabladid.is