Hugsanlega í mál við útrásavíkinga og bankastjóra

Fjármálaráðherra segir ekki útilokað að eigendur og stjórnendur gömlu bankanna verði meðal þeirra sem skaðabótamál verði höfðuð gegn, verði sýnt fram á að þeir hafi bakað ríkinu og almenningi tjóni með athöfnum sínum fyrir og eftir bankahrun.

Ríkisstjórnin féllst á tillögu í morgun um að skipuð yrði fjögurra manna verkefnisstjórn frá jafnmörgum ráðuneytum og ráðnir sjálfstætt starfandi lögmenn til að fara ofan í saumana á þessum málum. Vonast er til að unnt verði að sýna fram á bótaskyldu einstaklinga og fyrirtækja.

Fjármálaráðherra segir að í fyrstu verði málin skoðuð almennt, augljósustu dæmin verði tekin fyrir, sem hugsanlega geti orðið fordæmisgefandi. Hann vill ekki nefna einstaka menn eða einstök fyrirtæki til sögunnar, en segir að komist mál á skrið sé ekki hægt að útiloka að stjórnendur og eigendur gömlu bankanna lendi í eldlínunni.

„Nei, nei það er augljóst mál. Þetta er sett af stað vegna bankahrunsins og efnahagshrunsins og þess tjóns sem ríkið og samfélagið er að verða fyrir. Ég held að það hljóti að réttlæta kröfur og fullnægi sanngirni um að farið sé yfir þennan þátt málsins. Þetta er eðlilegur hluti af hagsmunagæslu fyrir hönd ríkisins og almennings, en líka að réttlæti nái fram að ganga," segir Steingrímur J. Sigfússon, fjármálaráðherra.

Málin beinast fyrst og fremst að íslenskum ríkisborgurum og fyrirtækjum. Hraða á starfinu, en það fæst þó ekki gefins.

„Þetta mun kosta eitthvað í útlagða vinnu, en við teljum rétt og skylt að leggja út fyrir því og vonandi fæst nú eitthvað upp í það ef mál vinnast," segir Steingrímur.