Símasvindl: Varað við óþekktum erlendum símanúmerum

Símasvindlarar hafa herjað á íslendinga upp á síðkastið. Samkvæmt upplýsingum frá Símanum bárust 1400 svokölluð uppköll frá 15.janúar en svipað svindl kom upp fyrir nokkrum mánuðum. Upplýsingafulltrúar Símans og Vodafone hvetja fólk til þess að vera á varðbergi gagnvart hringingum úr óþekktum númerum.

Svindlið virkar þannig að hringt er í íslenska síma eina til þrjár hringingar. Síðan þegar hringt er tilbaka er rukkað fyrir þá hringingu, oft nokkur þúsund krónur, sem síðan leggst inn á reikning eiganandans sem hringdi tilbaka. Hægt er að þekkja þessi númer þar sem þau byrja á talnarununni 882.

Margrét Stefánsdóttir upplýsingafulltrúi Símans segir að fyrirtækið hafi heyrt af þessu og brugðist við. Búið sé að loka fyrir hringingar úr númerum sem hefjast á þessari talnarunu. Viðskiptavinir Símans eigi því ekki að geta fengið símtöl sem þessi.

Hægt er að sjá hve mörg uppköll af þessu tagi hafi borist viðskiptavinum Símans og segir Margrét þau vera um 1400 frá 15.janúar. Hún hvetur fólk því til þess að vera á varðbergi gagnvart erlendum númerum sem það þekkir ekki.

Hrannar Pétursson hjá Vodafone tekur í sama streng en fyrirtækið hefur lokað fyrir númer sem byrja á umræddri talnarunu. Viðskiptavinir Vodafone geta því heldur ekki hringt tilbaka í þessi númer.

Hann segir að fyrir nokkrum vikum hafi svipað komið upp með talnarunu frá Ítalíu og þar áður í gegnum gervihnattakerfi annarsstaðar frá.

„Þetta er eins og með margt annað að skúrkarnir eru oft einu skrefi á undan. En við reynum að bregðast við þessu með aðgerðum sem þessum."

Liv Bergþórsdóttir forstjóri Nova hefur einnig heyrt af umræddu svindli. „Ég get staðfest að hjá Nova er og hefur verið lokað fyrir þessi símtöl. Við höfum ekki haft opið fyrir þessi númer.“