Síðasta serían af Prison Break

Á sama tíma og áhorfendur Stöðvar 2 eru að missa sig yfir spennunni í Prison Break berast váleg tíðindi frá Ameríku. Fox sjónvarpsstöðin sem framleiðir þættina gaf það út í dag að framleiðslu þáttanna verði hætt að lokinni þessari seríu.

„Það er engin auðveld aðferð til þess að segja ykkur aðdáendum Prison Break frá þessu svo við gerum það bara hreint út. Prison Break hafa náð á endastöð," segir í frétt á tv.com í dag.

Þetta kemur kannski ekki mörgum á óvart þar sem Fox sjónvarpsstöðin hefur aðallega lagt áherslu á Fringe, 24 og Lie to Me sem einnig hafa verið sýndir á Stöð 2 upp á síðkastið.

Þættirnir eru nú í hléi í Bandaríkjunum en hefja aftur göngu sína þann 17.apríl.

Aðdáendur sem ætla að hefja herferð til þess að fá framleiðendurna til þess að gera aðra seríu eru beðnir að hafa það á bak við eyrað að í upphafi áttu þættirnir einungis að vera í eina seríu. En vinsældir þeirra gerðu það að verkum að fjórar seríur voru gerðar.