Átök í Teheran vegna úrslita forsetakosninganna

Til átaka hefur komið milli stjórnarandstæðinga og lögreglu í Teheran, höfuðborg Írans, í dag eftir að tilkynnt var að Mahmoud Ahmadinejad hefði verið endurkjörinn forseti landsins í kosningum í gær.

Helsti andstæðingur hans, Mir Hossein Músaví, leiðtogi umbótasinna og fyrrverandi forsætisráðherra landsins, varð annar.

Hann segir að Ahmadinejad og stuðningsmenn hans hafi gerst sekir um kosningasvik. Stuðningsmenn Músaví hafa mótmælt á götum úti þó fjöldasamkomur hafi verið bannaðar í Íran í dag.

Ali Kamení, æðstiklerkur í Íran, hefur hvatt landa sína til að sýna stillingu. Hann bað andstæðinga nýkjörins forseta um að draga sig í hlé um leið og hann óskaði Ahmadinejad til hamingju með sigurinn.