Tónlistarmenn bera vitni í máli Jóhanns

Tveir breskir lögfræðingar komu hingað lands fyrir jól og ræddu við þrjá íslenska tónlistarmenn vegna málshöfðunar Jóhanns Helgasonar gegn norska lagahöfundinum Rolf Løvland.

Líkast til munu tónlistarmennirnir bera vitni í málinu, sem Jóhann höfðaði vegna líkinda lags hans Söknuður við lag Rolfs, You Raise Me Up, sem Bandaríkjamaðurinn Josh Groban gerði vinsælt. Búið er að meta líkindin með lögunum bæði hér heima og erlendis. Hérna voru líkindin metin 97% og úti var matið einnig mjög jákvætt. „Þeir fóru yfir málið og töluðu við nokkur vitni," segir Jóhann og vill sem stendur ekki nefna þau á nafn. „Þetta er dálítið stórt mál og þeir leggja mikla áherslu á að vera með allt inni áður en málið fer fyrir rétt."

Að sögn Jóhanns söfnuðu lögfræðingarnir, sem starfa á vegum hins gamalgróna fyrirtækis Knight & Sons, gögnum hér á landi sem þykja sanna að Rolf hafi fengið Söknuð í hendurnar á meðan hann var staddur hér á síðasta áratug. Tók hann meðal annars upp plötu hér með hljómsveit sinni Secret Garden auk þess sem hann tók upp jólalag með Siggu Beinteins. „Það er nánast hægt að fullyrða að hann hafi fengið kynningardisk með íslenskri tónlist þar sem þetta lag var. Það er dálítill plús í svona málum að geta bent á svoleiðis," segir Jóhann.

Ekki hefur verið ákveðið hvenær réttað verður í málinu en líklega verður það í vor eða sumar. - fb