Heimir: Nokkuð sáttur

Heimir Guðjónsson segir að FH-ingar fari sáttir inn í veturinn eftir 1-1 jafntefli gegn Fylki í dag.

„Ég er nokkuð sáttur. Þetta var fínn leikur miðað við hvernig veðrið var á köflum. Bæði lið reyndu að spila sóknarleik og það var í raun ótrúlegt að aðeins tvö mörk voru skoruð í fyrri hálfleik."

„En auðvitað hefði maður viljað vinna leikinn og við fengum gott færi undir lokin til að gera það. En það var fínt að ná 1-1 jafntefli gegn mjög sterku Fylkisliði," sagði Heimir. „Við förum sáttir inn í veturinn."

Hann segir að það hafi verið nokkuð erfitt að fá sína menn upp á tærnar fyrir leikinn.

„Við vorum slakir fyrstu 20 mínúturnar og lentum þá undir. En þá rifu menn sig aðeins í gang. Þetta var heilt yfir ágætisleikur af okkar hálfu."