Björgólfur: Einn eftirminnilegasti dagurinn á ævinni

Björgólfur Takefusa fór á kostum í 5-2 sigri KR á Val og tryggði sér gullskóinn í Pepsi-deild karla með því að setja boltann fimm sinnum framhjá Kjartani Sturlusyni markverði Vals í leiknum.

„Þetta hlýtur að vera einn eftirminnilegasti dagur sem ég hef upplifað. Ég vona að þetta verði samt ekki sá eini," sagði Björgólfur Takefusa í skýjunum eftir að hafa skorað fimm mörk í sigri á Val og tryggt sér gullskóinn.

„Maður hafði engu að tapa og var vel gíraður fyrir leikinn. Það gekk bara allt upp í dag," sagði Björgólfur en bætti strax við: „Reyndar gekk ekki allt upp því ég klúðraði einhverjum tveimur til þremur dauðafærum sem ég átti að skora úr," sagði Björgólfur í léttum tón.

„Þetta er frábært fótboltalið og við leikmennirnir í liðinu erum búnir að smella vel saman í ár. Við erum að spila skemmtilegan fótbolta og það er mjög gaman af þessu," sagði Björgólfur.

„Það þurfti mikið að ganga upp til þess að ég næði í gullskóinn. Ég var samt ekki að hugsa samt um það. Ég ætlaði að sjá hvað ég gæti gert og hugsa fyrst og fremst um að liðið myndi vinna. Ef ég myndi skora þá væri það flott og ég ætlaði síðan bara að sjá til í lokin hverju þetta myndi skila," sagði Björgólfur sem var lengi að hugsa um hvort að hann yrði með í ár en hann sér ekki eftir því að hafa byrjað aftur.

Björgólfur veit að KR-ingum leiddist það ekkert sérstaklega að hafa unnið 5-2 stórsigur á erkifjendum sínum á Hlíðarenda.

„Það er mikill rígur á milli Vals og KR og ég held að margir KR-ingar séu ánægðir með að KR skildi vinna 5-2 á Hlíðarenda. Það er frábært að fá að taka þátt í slíkum sigri og hafa getað gert eitthvað í þeim leik. Stuðningsmennirnir fara örugglega ánægðir heim og skemmta sér í kvöld," sagði Björgólfur að lokum.