Björgólfur fær gullskóinn

Björgólfur Takefusa varð markahæsti leikmaður Pepsi-deildar karla eftir að hann skoraði öll fimm mörk KR í 5-2 sigri á Val í dag.

Þegar dagurinn hófst var Björgólfur þremur mörkum á eftir Atla Viðari Björnssyni, FH-ingi, sem tókst ekki að skora í dag. FH gerði jafntefli við Fylki, 1-1.

Björgólfur skoraði alls sextán mörk í sumar. Atli Viðar skoraði fjórtán og fær því silfurskóinn.

Alfreð Finnbogason, leikmaður Breiðabliks, skoraði tvö mörk fyrir sína menn gegn Grindavík og því alls þrettán mörk. Hann fær bronsskóinn.