Flanagan: Þið standið undir skuldunum

Mark Flanagan, fulltrúi Alþjóðagjaldeyrissjóðsins, lagði áherslu á það á blaðamannafundi á Kjarvalsstöðum í dag að Íslendingar geti staðið undir skuldabyrði hins opinbera. Flanagan sagði að margir hefðu spurt sig að þessu á meðan á heimsókn hans hefur staðið síðustu daga en að hann sé sé þeirrar skoðunnar að landið geti staðið undir skuldunum.

Í tilkynningu frá AGS sem send var út í dag segir einnig að þróun hér á landi síðustu mánuði hafi „í grófum dráttum" verið samsvarandi við spá sjóðsins. Sjóðurinn býst við því að botninum verði náð á næsta ári og með því að beita styrkri peningamálastefnu ætti að vera mögulegt að ná stöðugleika í gjaldeyrismálum auk þess sem verðbólgumarkmið ættu að nást.

Þá segir að eitt aðalviðfangsefnið sé að afnema gjaldeyrishöft í landinu. Það ætti að geta hafist síðar á árinu en að afnám haftanna verði tekið í smáum skrefum.