Miðasalan fer hægt af stað

Danska rokkveislan í Hróarskeldu hefur haft mikið aðdráttarafl hjá íslenskum rokkhundum á ári hverju. Kreppan hefur nú stimplað sig þar inn.

Miðasala á Hróarskelduhátíðina í Danmörku hefur gengið afar hægt hér á landi síðan hún hófst í byrjun desember. Að sögn Tómasar Young, tengiliðs hátíðarinnar, eru tvær ástæður fyrir því. Annars vegar efnahagskreppan og hins vegar að enn á eftir að tilkynna hvaða hljómsveitir spila á hátíðinni.

„Það er búið að selja eitthvað af miðum. Ég hef ekki fengið töluna en hún fer mjög hægt af stað,“ segir Tómas um söluna. Hann segir þetta mikla breytingu frá því sem verið hefur. „Það er ekki gott hljóðið í flestum en svo eru líka einhverjir sem segja skítt með kreppuna og ætla samt að fara. Ég held að það séu þessir allra hörðustu aðdáendur Hróarskeldu.“ Fjöldi Íslendinga á Hróarskeldu sem keypti miða hérlendis tvöfaldaðist á árunum 2004 til 2007 og fór úr rúmum 760 manns í rúm 1.600. Á síðasta ári kvað aftur á móti við nýjan tón því þá hrapaði fjöldinn niður í 860 manns. Nú má búast við að Íslendingunum fækki enn frekar.

Miðaverð á Hróarskeldu er nú komið í 46.500 krónur sem er mikil breyting frá því í fyrra þegar það var á bilinu 24 til 30 þúsund krónur. Hefur miðinn jafnframt hækkað um 3.700 krónur síðan í byrjun desember, allt út af lækkandi gengi krónunnar. „Það liggur við að maður sé hættur að fylgjast með þessu,“ segir Tómas. Hann býst samt við því að salan eigi eftir að glæðast enda bíða margir með að kaupa miða þar til tilkynnt hefur verið hvaða hljómsveitir spila á hátíðinni. Sú tilkynning hefur dregist óvenju mikið á langinn því fyrir hátíðina í fyrra var sagt frá því í desember að Radiohead myndi stíga á svið. - fb