Stjörnur í afmæli Stjána Stuð

Kristján Þórðarson, betur þekktur sem útvarpsmaðurinn Stjáni Stuð, heldur upp á fertugsafmæli sitt í lok maí. Það er ekki vottur af kreppubrag á veislunni og Elton John og Ólafur Ólafsson falla algjörlega í skuggann á poppstjörnunum sem Stjáni býður upp á í sínu afmæli. „Þetta er svona allt að smella núna. Sjonni Brink byrjar þetta, en svo koma meðal annars fram Skítamórall, Á móti sól og Land og synir. Hljómsveitin Hitakútur endar tónleikana. Svo á ég eftir að tala við Ný dönsk, en Ingó og Veðurguðirnir og Greifarnir gefa endanlegt svar í mars. Þetta eru allt vinir og kunningjar,“ segir Stjáni.

Afmælisveislan hefur verið lengi í undirbúningi en hún verður haldin í sal í Stangarholti. „Við erum fimm í skemmtinefndinni en það eru margir sem hjálpa. Til dæmis strákarnir í Exton sem skaffa diskóljós. Salurinn tekur 120 manns í sæti en hinir verða bara að standa og dansa.“

Stjáni og Soffía og bróðir Stjána og fjölskylda hans, fara nokkrum dögum eftir afmælið í mikla skemmtiferð til Flórída og er stefnan tekin þráðbeint á Disneyland. Stjáni var svartsýnn á að af ferðinni yrði fyrir nokkrum mánuðum vegna gengishruns krónunnar, en nú er hann búinn að taka ákvörðun um að kýla á ferðina. „Maður verður nú ekki fertugur nema einu sinni á ári!“ segir Stjáni og hlær.- drg