Deilan um þingflokksherbergi framsóknarmanna sett í salt

Störf aðstoðarmanna þingmanna verða lögð niður samkvæmt ákvörðun forsætisnefndar Alþingis í morgun. Þá hefur deilan um þingflokksherbergi Framsóknarmanna verið sett í salt fram að haustþingi.

Forseti Alþingis hefur ákveðið að ekki verði ýtt við Framsóknarmönnum í þingflokksherbergi þeirra á sumarþingi, svo þeir fá að vera í fundarherbergi sínu að minnsta kosti fram á haust. En fyrri forseti Alþingis ákvað að þeir skyldu víkja fyrir stærri þingflokki Vinstri grænna sem sprengt hefur utan af sér sína fundaraðstöðu.

Alþingi sparar 50 milljónir

Réttur þingmanna í landsbyggðarkjördæmunum til að ráða sér aðstoðarmenn hefur verið umdeildur frá upphafi. En það er ekki ástæðan fyrir því að þessi réttur er afnuminn nú.

Ásta Ragnheiður Jóhannesdóttir forseti Alþingis segir ástand efnahagsmála meginástæðu þess að aðstoðarmannakerfið sé nú aflagt. En einnig hefur gætt óánægju með kerfið þar sem það mismunaði þingmönnum eftir kjördæmum, því þingmenn í Reykjavík og Suðvesturkjördæmi áttu ekki rétt á að ráða sér aðstoðarmenn.

Ásta Ragnheiður segir að Alþingi muni spara um 50 milljónir króna með þessari ákvörðun. Ekki þurfi að segja neinum upp störfum vegna þessa þar sem samningar við aðstoðarmenn hafi verið lausir. En samningar aðstoðarmanna urðu sjálfkrafa lausir við þingrof og kosningar, en aðstoðarmenn fá biðlaun í þrjá mánuði.