Ákærð fyrir að ljúga til um nauðgun

Ríkissaksóknari hefur ákært átján ára stúlku fyrir að hafa logið upp á fjóra menn að þeir hefðu nauðgað henni. Mennirnir voru úrskurðaðir í gæsluvarðhald á grundvelli ásakananna. Þung refsing getur legið við röngum sakargiftum af þessu tagi.

Það var 4. nóvember í fyrra sem stúlkan hafði samband við lögreglu og sagði að mennirnir fjórir hefðu nauðgað henni í húsi ofan við Sundahöfn í Reykjavík. Hún ítrekaði síðan framburðinn síðar, en breytti honum á þann veg að líklega hefði einn mannanna ekki haft við hana samræði.

Mennirnir voru handteknir í kjölfarið, yfirheyrðir, látnir gangast undir líkamsrannsókn og síðan úrskurðaðir í gæsluvarðhald. Þeir gengust við því að hafa haft við hana samræði, en fullyrtu að það hefði verið með hennar vilja. Mennirnir sátu í varðhaldi í tvo daga.

Stúlkan hefur nú verið ákærð fyrir rangan framburð og rangar sakargiftir, en hámarksrefsing fyrir slíkt er tíu ára fangelsi. Einn mannanna krefst tæplega 1,2 milljóna króna í skaðabætur og annar krefst hálfrar milljónar.

Ákæran var þingfest í Héraðsdómi Reykjavíkur í gær. - sh