Verktakar bjóða undir kostnaðaráætlunum Vegagerðarinnar

Örvænting ríkir meðal verktaka sem gera nú allt að helmingi lægri tilboð í framkvæmdir fyrir Vegagerðina, en kostnaðaráætlun gerir ráð fyrir. Þetta ætti að þýða að hægt verði að ráðast í gagngerar umbætur á vegakerfinu.

Vegagerðin opnaði í dag tilboð í lagningu kaflans sem tengir Vopnafjörð við Hringveginn. Alls bárust þrettán tilboð. Vegagerðin gerði ráð fyrir að verkið kostaði tæpan einn og hálfan milljarð króna. Nær öll tilboðin sem bárust, eða ellefu, voru undir þeirri upphæð. Þeir verktakar sem buðu lægst gerðu nær helmingi lægra tilboð en áætlun Vegagerðarinnar hljóðaði upp á eða rúmar sjö hundruð milljónir króna. Hreinn Haraldsson vegamálastjóri segir þau tilboð sem borist hafa á undanfarið yfirleitt lægri en þær kostnaðaráætlanir Vegagerðarinnar. Tilboðin sýni mjög lágar tölur miðað við það sem reiknað var með og séu allt niður í helming.

Til samanburðar voru tilboð í verk sem boðin voru út þegar þenslan var sem mest í þjóðfélaginu yfirleitt svipuð og áætlanir gerðu ráð fyrir. Vegamálastjóri segir fleiri verktaka sækjast eftir verkefnum en áður og að sú tala hafi jafnvel tvöfaldast. Þetta sé vegna þess hve lítið sé um verkefni í verktakaiðnaðnum, sérstaklega í jarðverkefnum.

Það sem sparast við lægri kostnað við verkin gæti orðið til þess að Vegagerðin fjölgaði verkefnum sínum. Vegamálastjóri segir þetta skapa möguleika á því að fara út í fleiri framkvæmdir á árinu en gert var ráð fyrir. Vegagerðin hafi ákveðna tölu til að eyða á árinu og lág tilboð skapi rými fyrir fleiri verk.