Reið hesti upp í Sívala turninn í Kaupmannahöfn

Danskur hestamaður bíður þess nú að sjá hvort hann verður kærður fyrir að ríða á hesti sínum upp í Sívala turninn í Kaupmannahöfn.

Það var í fyrsta skipti í 293 ár sem slíkt er gert. Sá síðasti sem reið upp í turninn var Pétur mikli Rússakeisari og það var árið 1716.

Hinn 55 ára gamli Simon Thorkelin segir að sig hafi dreymt um það í mörg ár að feta í fótspor Rússakeisara. Og hann lét af því verða snemma á laugardagsmorgun. Í óleyfi náttúrlega.

Ekki eru tröppur upp í Sívala turninn heldur breiður aflíðandi rampur. Sagt er að Kristján konungur fjórði sem lét byggja turninn sem stjörnuskoðunarstöð hafi látið gera rampinn til þess að komast upp í turninn í hestvagni sínum.

Á leiðinni upp rakst Simon Thorkelin á Jesper Vang Hansen framkvæmdastjóra turnsins, sem veit eiginlega ekki hvernig hann á að bregðast við þessu.

Þess má geta að frá götunni og upp á útsýnispall turnsins eru 34.8 metrar. Lokið var við að reisa turninn árið 1642.