Gunnsteinn aftekur þreifingar við Vinstri græna

„Þetta er bara bull og vitleysa," segir Gunnsteinn Sigurðsson, bæjarfulltrúi Sjálfstæðisflokksins í Kópavogi, aðspurður hvort þreifingar hafi farið fram við Vinstri-græna um meirihlutasamstarf flokkanna í bænum. Bæjarfulltrúi Vinstri grænna sagði svo vera í samtali við fréttastofu fyrr í dag.

„Það er ekki rétt. Ég fullyrði það," segir Gunnsteinn hins vegar. Hann aftekur að þreifingar um hugsanlegt samstarf hafi farið fram við aðra flokka.

Ómar Stefánsson, oddviti Framsóknar, sagðist í samtali við fréttastofu vera orðinn óþolinmóður að bíða eftir hugmyndum sjálfstæðismanna um framtíð samstarfsins.

Gunnsteinn segist búast við að Gunnar Birgisson muni spjalla við Ómar síðar í dag, en sagðist ekki vita hversu lengi Ómar þyrfti að bíða í viðbót.

Aðspurður hvort meirihlutasamstarf Framsóknar og Sjálfstæðisflokks hangi á bláþræði segir Gunnsteinn ekki telja það. Hann sé bæði bjartsýnn á að meirihlutinn haldi og voni að svo verði.