Ólafur: Menn bognuðu í sumar en brotnuðu aldrei

„Ég er mjög ánægður með spilamennskuna við erfiðar aðstæður og fyrstu tvö mörkin okkar voru mjög góð og sérstaklega annað markið sem var tær snilld. Við skoruðum þrjú og héldum hreinu og það er frábært," segir Ólafur Kristjánsson þjálfari Breiðabliks í leikslok eftir 3-0 sigur gegn Grindavík í lokaumferð Pepsi-deildarinnar í kvöld.

„Það er búinn að vera stígandi í okkar leik síðustu mánuði og við förum bara fullir sjálfstrausts inn í undirbúninginn fyrir bikarúrslitaleikinn og það er mikil eftirvænting í hópnum. Menn hafa verið að tala um það fyrir síðustu tvo leiki okkar hvort að við munum mæta með hausinn í lagi og það höfum við gert," segir Ólafur sem er heilt yfir sáttur með sumarið hjá liði sínu.

„Það er ýmislegt sem hefði getað farið öðruvísi þegar ég lít til baka en það sem ég er ánægðastur með að mótlætið sem við lentum í braut ekki liðið. Menn bognuðu en brotnuðu ekki og sýndu mjög góðan karakter seinni hluta sumars. Síðasta tímabil var svona endasleppt hjá okkur og við töluðum um það fyrir sumarið að laga ýmsa hluti. Við erum með fleiri stig og fleir mörk skoruð og erum með bætingu á flestum sviðum þrátt fyrir að hafa misst ellefu leikmenn fyrir tímabilið og það er mjög ánægjulegt," segir Ólafur.