Svandís er slíkt heljarmenni

Ung Vinstri græn sendu frá sér ályktun í kvöld þar sem ákvörðun Svandísar Svavarsdóttur um að fresta hinni svokölluðu Suðvesturlínu er studd. Í ályktuninni segir að stundum sé erfitt að standa við það sem maður telji rétt. Undanfarna daga hafi Svandís hinsvegar sýnt svo um munar að hún sé slíkt heljarmenni.

„Það er auðvelt að missa sjónar á stóra samhenginu og langtímahagsmunum þegar heil þjóð stendur frammi fyrir jafnslæmu efnahagsástandi og Íslendingar. Þá er auðvelt að stíga bensínið á stóriðjutrukknum í botn - virkja, bræða, reyna að græða. „Í þessum ólgusjó, þá gengur ekkert að hugsa um smámál," segja stóru karlarnir og eiga þar við smælkið sem má hunsa: umhverfi Íslands, lofthjúp heimsins - já, og þá litlu spurningu hvort sé yfir höfuð til næg orka í landinu til að seðja stóriðjulosta þeirra gráðugustu," segir í ályktuninni.

Þá segir að vandamál Íslands verði ekkil eyst með botnlausri stóriðjustefnu. Slíka stefna hafi verið rekin í 18 ára stjórnartíð Sjálfstæðisflokksins og hún hafi ekki náð að forða landinu frá kreppu, heldur hafi í raun gert skellinn mun harðari en hann ella hefði orðið.

„Slík stefna krefst þess að horfið sé frá heilbrigðri skynsemi; stórframkvæmdir séu hlutaðar sundur til að svindla þeim í smáskömmtum í gegnum umhverfismat, allri framtíðarorku landsins sé troðið í örfáar mengandi verksmiðjur og öllum árum róið að einni einustu lausn út úr ólgusjónum."

Þá segir að nú þurfi ríkið að taka á honum stóra sínum og styðja sem flest það sem getur reist íslenskt efnahagslíf við.

„Í því starfi er ekki skynsamlegt að einblína á stóriðjuna, sem þegar hefur brugðist. Skynsamlegt er að hugsa til framtíðar, líkt og umhverfisráðherra gerir. Stjórn Ungra vinstri grænna lýsir fullum stuðningi sínum við Svandísi Svavarsdóttur og treystir henni til að fylgja sannfæringu sinni nú sem endranær."