Miklu betur búið en í upphafi

Fjármálaráðuneytinu verður falið að kynna Bretum og Hollendingum fyrirvara Alþingis við ríkisábyrgð Icesave-lánanna og fá frá þeim formlega staðfestingu á að þeir fallist á þá.

Þetta er önnur tveggja breytinga sem fjárlaganefnd gerir á Icesave-frumvarpinu milli annarrar og þriðju umræðu þingsins. Hin breytingin snýr að málsmeðferð eftir árið 2024 ef eftirstöðvar verða af láninu. Fjárlaganefnd segir að komi sú staða upp skuli einfaldlega teknar upp viðræður milli aðila um framhaldið.

Að breytingunum standa allir flokka utan Framsóknar.

Með þessum breytingum er umfjöllun fjárlaganefndar um málið lokið. Það verður tekið til þriðju umræðu í þinginu á fimmtudag.

Guðbjartur Hannesson, formaður fjárlaganefndar, segir málið allt hafa styrkst síðan nefndin fékk það til umfjöllunar 6. júlí.

„Við höfum unnið að því að styrkja það með íslenska hagsmuni í huga. Við það eru settir miklir lagalegir og efnahagslegir fyrirvarar og ég tel klárlega að málið sé miklu betur búið en í upphafi.“

Ekki liggur fyrir hve miklum tíma fjárlaganefnd varði í umfjöllun um Icesave en Guðbjartur segir nefndina hafa fundað svo að segja daglega, ýmist formlega eða óformlega, allt frá því að hún fékk málið í hendur fyrir rúmum sjö vikum.

„Þetta var erfiður tími en spennandi og ögrandi og af starfinu hlaust mikill lærdómur,“ segir Guðbjartur. Samstarfið í fjárlaganefnd hafi verið gott og menn lagt sig fram um að betrumbæta málið.

Fyrir fjárlaganefnd liggur nú að vinna að fjárlagafrumvarpi ársins 2010.- bþs