Össur og Miliband í hreinskiptum viðræðum um Icesave

Össur Skarphéðinsson utanríkisráðherra átti í dag fund í Lundúnum með breskum starfsbróður sínum, David Miliband eins og áður hefur verið greint frá. Í tilkynningu frá utanríkisráðuneytinu segir að ráðherrarnir hafi átt hreinskiptnar og uppbyggilegar viðræður um óleyst úrlausnarefni og tvíhliða samskipti ríkjanna.

„Ráðherrarnir sammæltust um að ljúka viðræðum vegna Icesave, með öðrum hluteigandi aðilum, á ásættanlegan hátt fyrir báðar þjóðir, eins fljótt og kostur er," segir í tilkynningunni auk þess sem greint er frá því að viðræðunefndir undir forystu fjármálaráðuneyta þjóðanna munu fylgja fundi utanríkisráðherranna eftir.

„Þá lögðu utanríkisráðherrarnir áherslu á mikilvægri góðra samskipta ríkjanna svo og aukinna samskipta á sviði öryggis- og varnarmála, Norðurslóða og endurnýjanlegrar orku," segir ennfremur.